പാലാ: മീനച്ചിലാറിന്‍റെ തടയണയിൽ നഞ്ച് കലക്കി മീൻ പിടിച്ചു. പാലായുടെ ജല സ്രോതസായ കളരിയാംമാക്കൽ തടയണയിൽ ഇടപ്പാടി ഭാഗത്താണ് നഞ്ച് കലർത്തി മീൻ പിടിച്ചത്. മീൻ ചത്തു പൊങ്ങിക്കിടക്കുന്നത് കണ്ടാണ് നാട്ടുകാർ സംഭവം അറിഞ്ഞത്. കുടിവെള്ളത്തിന് കടുത്ത ക്ഷാമം നേരിടുന്ന സമയത്ത് തടയണ വെള്ളത്തിൽ വിഷം കലർത്തി നടത്തിയ മീൻപിടിത്തം കടുത്ത പ്രതിഷേധത്തിന് ഇടയാക്കിയിരിക്കുകയാണ്. അനധികൃത മീൻപിടിത്തം ജലസ്രോതസിന് ഭീഷണിയാണ്. മേഖലയിലെ 20 കുടിവെള്ള പദ്ധതികളുടെ കിണർ ഈ തടയണയിലാണ്. വള്ളത്തിൽ എത്തിയാണ് നഞ്ച്, തുരിശ് എന്നിവ കലർത്തി മീൻ പിടിക്കുന്നതെന്നു നാട്ടുകാർ പറയുന്നു.