കൊച്ചി: കൂത്താട്ടുകുളത്തെ രാജീവ് ഗാന്ധി സഹകരണ ആശുപത്രി ലൈസന്‍സും അനുമതികളുമില്ലാതെ പ്രവര്‍ത്തിക്കുന്നില്ലെന്ന് എറണാകുളം ജില്ലാ കളക്ടറും കൂത്താട്ടുകുളം നഗരസഭയും ഉറപ്പാക്കണമെന്ന് ഹൈക്കോടതി നിര്‍ദേശം നല്‍കി. രാജീവ് ഗാന്ധി സഹകരണ ആശുപത്രിയുടെ പ്രവര്‍ത്തനം നിയമപരമല്ലെന്ന് ചൂണ്ടിക്കാട്ടി കൂത്താട്ടുകുളം സ്വദേശി ജസ്റ്റിന്‍ ഏലിയാസ് നല്‍കിയ ഹര്‍ജിയിലാണു ഹൈക്കോടതിയുടെ ഇടക്കാല ഉത്തരവ്.
സഹകരണ ആശുപത്രിയുടെ ലൈസന്‍സും അനുമതി രേഖകളും ഹാജരാക്കാന്‍ ആശുപത്രി അധികൃതര്‍ കോടതിയില്‍ കൂടുതല്‍ സമയം തേടി. സഹകരണ ആശുപത്രി പൂര്‍ണതോതില്‍ പ്രവര്‍ത്തിക്കുന്നില്ലെന്നും കണ്‍സള്‍ട്ടേഷന്‍ മാത്രമാണ് ഇവിടെ നടക്കുന്നതെന്നും ആശുപത്രി അധികൃതര്‍ വ്യക്തമാക്കി. മതിയായ അനുമതികളും ലൈസന്‍സുമില്ലാതെ ആശുപത്രി പ്രവര്‍ത്തിക്കരുതെന്ന് ഹൈക്കോടതി നിര്‍ദേശിച്ചു.
ഇവിടെ രോഗികളെ അഡ്മിറ്റ് ചെയ്യുകയോ ചികിത്സ നല്‍കുകയോ ചെയ്യുന്നില്ലെന്ന് കളക്ടറും നഗരസഭയും ഉറപ്പാക്കണമെന്നും ഉത്തരവില്‍ പറയുന്നു. ഹര്‍ജി മൂന്നാഴ്ച കഴിഞ്ഞു വീണ്ടും പരിഗണിക്കും.